Lidhja Demokratike e Kosovës (LDK), ka mbajtur mbledhjen e Këshilli të Përgjithshëm.
Aty, kryetari i këtij subjekti politik opozitar, Lumir Abdixhiku, ka kriitkuar ashpër pushtetin e Lëvizjes Vetëvendosje që drejtohet nga Albin Kurti.
“Përdori pushtetin për arrogancë, propagandë, polarizim”, ishte akuza e Abdixhikut drejtuar Kurtit.
Sipas tij, Kurti ka dështuar qeverisje. Abdixhiku tha se 12 miliardë euro ka menaxhuar për tri vjet – dhe shton se “s’la shenjë”.
Më poshtë fjalimi i plotë i Abdixhikut:
Zonja e zotërinj,
Të dashur anëtarë të Këshillit të Përgjithshëm,
Të dashur bashkëveprimtarë,
Jemi mbledhur sot këtu, në mbledhjen e dytë të Këshillit të Përgjithshëm, në një moment pivotal, për të ardhmen e vendit dhe së këndejmi të Lidhjes Demokratike të Kosovës. Jemi bërë bashkë, jo vetëm si përfaqësues më të lartë të kësaj shtëpie të demokracisë, por si veprimtarë e veprimtare, të dedikuara për vendin tonë, të përbashkuar rreth ëndrrës sonë të njëjtë për të tashmen dhe të ardhmen e Republikës, Kosova shtet i pavarur e sovran, i anëtarësuar në NATO dhe BE, e me miqësi të përhershme me Shtetet e Bashkuara të Amerikës.
Dhe kjo e ardhme duket e zymtë.
Kjo e ardhme duket e trishtë.
Ajo thërret për angazhimin tonë monumental, si garantues të vetëm politik të shtetësisë, si projektues të Republikës e si besimtarë të vet demokracisë.
Sot, teksa qëndrojmë në një udhëkryq kritik të vendit, të gjitha shtyllat identitare të Kosovës janë vënë në peshorën e fateve të popullistëve. Ato po gërmohen, po rrënohen dhe po tjetërsohen si synim ideologjik i mosbesuesve të pavarësisë.
Në këtë mision mosbesimi ndaj shtetësisë, të shpërfaqur tashmë dhe publikisht dhe krenarisht, përbashkimi i së djathtës në Kosovë bëhet domosdoshmëri. Ky përbashkim vjen si mision i ri politik i Lidhjes Demokratike të Kosovës. Jo vetëm se ne jemi ruajtës të një trashëgimie historike 34 vjeçare, por sepse jemi kultivues aktiv të konceptit shtetar të Republikës.
Pa ne, ky koncept zhbëhet.
Pa ne, rrugëtimi euroatlantik, zhvillimi ekonomik e uniteti kombëtar nuk kanë gjasë, siç u pa tash e tre vite e gjysmë pushtet popullist e majtist.
Për popullin e Kosovës, tre vite e gjysmë, janë mjaftueshëm për të kuptuar jo vetëm qëllimin e një pushteti, jo vetëm mënyrën e bërjes politikë, por dhe aftësinë, përkatësisht paaftësinë, fundamentale për t’i dhënë zgjidhje problemeve të përditshme e, sidomos, atyre nacionale.
Për popullin e Kosovës, tre vite e gjysmë pushtet, janë mjaftueshëm për të kuptuar dhe përmbajtjen dhe formën e pushtetarëve, e fatmirësisht dhe për të parashikuar të ardhmen, rrjedhimisht, për të nxitur veprimin në të tashmen.
Dhe sot na duhet reflektim për këtë të ardhme!
