Gjykata e Apelit ka vendosur që ta anulojë vendimin e Gjykatës Themelore për vazhdimin e paraburgimit ndaj kryeshefit të KEK-ut, Nagip Krasniqi.
Lajmin për Telegrafin e ka konfirmuar avokati i kryeshefit të KEK-ut, Nagip Krasniqit, Virtyt Ibrahimaga.
Sipas tij, Apeli ka aprovuar ankesën e tij dhe tash pritet që Themelorja të marr vendim tjetër.
Ibrahimaga tha se shpreson që Gjykata Themelore do të nxjerr vendim lirues nga paraburgimi për klientin e tij, Nagip Krasniqin.
“Gjykata e Apelit e ka aprovuar ankesën time, dhe e ka anuluar vendimin e Gjykatës Themelore për vazhdimin e paraburgimit të Nagip Krasniqit. Tash Gjykata Themelore duhet të vendosë prapë, pasi Gjykata e Apelit ia ka dhënë arsyetimin se pse ai vendim nuk është i bazuar. Po shpresojmë që Gjykata Themelore së shpejti do të nxjerrë vendim lirues nga paraburgimi ndaj Nagip Krasniqit”, tha Ibrahimaga.
Ndryshe, Krasniqi u arrestua më 19 prill nën dyshimin e keqpërdorimit të pozitës zyrtare, ushtrimit të ndikimit dhe konfliktit të interesit.
“Gjatë bastisjes janë sekuestruar dokumente të ndryshme që ndërlidhen me rastin, pajisje elektronike si tre kompjuter, një llap-top, një celular, një USB, në cilësi të provave materiale që do të shërbejnë për procedurën e mëtejme”, kishte njoftuar prokuroria.
Disa ditë më vonë, Bordi i Drejtorëve të KEK-ut mori vendim për pezullimin e Nagip Krasniqit nga detyra e punës së kryeshefit ekzekutiv, me efekt të menjëhershëm. /Telegrafi/
